அன்பின் மடல்
August 2023
கிறிஸ்துவுக்குள் அன்பான ஜெபப் பங்காளரே,
நாம் யூதராயினும், கிரேக்கராயினும், அடிமைகளாயினும், சுயாதீனராயினும், எல்லாரும் ஒரே ஆவியினாலே ஒரே சரீரத்திற்குள்ளாக ஞானஸ்நானம்பண்ணப்பட்டு, எல்லாரையும் ஒரே ஆவிக்குள்ளாகவே தாகந்தீர்த்த நம்முடைய இரட்சகராகிய இயேசு கிறிஸ்துவின் நாமத்தில் வாழ்த்துகள் (1 கொரி. 12:13). அநேக நேரங்களில் நாம் சபையிலே கூடிவந்திருக்கும்போது, பிரிவினைகளும், மார்க்கபேதங்களும் சில வேளைகளில் சில சபைகளில் அடிபிடிச் சண்டைகளும் ஏற்படுகிறதனை நம்மில் அநேகர் கண்டுவருகிறோம் (1 கொரி. 11:18,19). கர்த்தருடைய சரீரம் இன்னதென்றும் (1 கொரி. 11:29), தேவன் சரீரத்தினை எப்படி அமைத்திருக்கிறார் என்றும் நாம் பகுத்தறியாததினாலேயே இவைகள் நம்மில் ஏற்படுகிறதென்று நான் தைரியமாய்ச் சொல்லுவேன்.
அவர் தம்முடைய சித்தத்தின்படிதான் நம்மை சரீரத்தில் அவயவங்களாக அதினதின் இடத்தில் வைத்திருக்கிறார் (1 கொரி. 12:18) என்பதனை நாம் புரிந்துகொண்டால், நம்முடைய பலம் பலமடங்காக இருக்குமே; அதன் உபயோகமும் பன்மடங்காகப் பெருகியிருக்குமே.
கண்ணானது கையைப்பார்த்து: நீ எனக்கு வேண்டுவதில்லையென்றும்; தலையானது கால்களை நோக்கி: நீங்கள் எனக்கு வேண்டுவதில்லையென்றும் சொல்லக்கூடாதே! (1 கொரி. 12:21)
சரீர அவயவங்களில் பலவீனமுள்ளவைகளாய்க் காணப்படுகிறவைகளே மிகவும் வேண்டியவைகளாயிருக்கிறது.
மேலும், சரீர அவயவங்களில் கனவீனமாய்க் காணப்படுகிறவைகளுக்கே அதிக கனத்தைக் கொடுக்கிறோம்; நம்மில் இலட்சணமில்லாதவைகளே அதிக அலங்காரம் பெறும்;
நம்மில் இலட்சணமுள்ளவைகளுக்கு அலங்கரிப்பு வேண்டியதில்லை.
சரீரத்திலே பிரிவினையுண்டாயிராமல், அவயவங்கள் ஒன்றைக் குறித்து ஒன்று கவலையாயிருக்கும்படிக்கு, தேவன் கனத்தில் குறைவுள்ளதற்கு, அதிக கனத்தைக் கொடுத்து, இப்படிச் சரீரத்தை அமைத்திருக்கிறார்.
(1 கொரி. 12:21-25)
நீங்கள் கூடிவருதல் நன்மைக்கேதுவாயிராமல், தீமைக்கேதுவாயிருக்கிறது (1 கொரி. 11:17) என்பதுதான் பவுலடியாரின் கணிப்பு. அவை இன்றைக்கு வெளிப்படையாகத் தெரியவில்லையா? இந்த சம்பவங்கள் மிகுந்த துக்கத்தினைத் தருவதாயிருக்கிறது மாத்திரமல்லாமல், உலகம் நம்மைப் பார்த்து ஏளனமாய்ச் சிரிக்கவும், தூஷிக்கவும் ஏதுவாகிறதே (ரோமர் 2:24). நீ தேவனுடைய நியாயத்தீர்ப்புக்குத் தப்பிக்கொள்ளலாமென்று நினைக்கிறாயோ? (ரோமர் 2:3)
உன் மனக்கடினத்திற்கும் குணப்படாத இருதயத்திற்கும் ஏற்றபடி, தேவனுடைய நீதியுள்ள தீர்ப்பு வெளிப்படும் கோபாக்கினைநாளிலே உனக்காகக் கோபாக்கினையைக் குவித்துக்கொள்ளுகிறாயே. தேவன் அவனவனுடைய கிரியைகளுக்குத்தக்கதாய் அவனவனுக்குப் பலனளிப்பார்.சோர்ந்துபோகாமல் (இந்தச் சூழ்நிலையிலும்) நற்கிரியைகளைச்செய்து, மகிமையையும் கனத்தையும் அழியாமையையும் தேடுகிறவர்களுக்கு நித்தியஜீவனை அளிப்பார் (ரோமர் 2:5-7). சண்டைக்காரராயிருந்து, சத்தியத்திற்குக் கீழ்ப்படியாமல், அநியாயத்திற்குக் கீழ்ப்படிந்திருக்கிறவர்களுக்கோ உக்கிரகோபாக்கினை வரும். முன்பு யூதரிலும் பின்பு கிரேக்கரிலும் பொல்லாங்குசெய்கிற எந்த மனுஷ ஆத்துமாவுக்கும் உபத்திரவமும் வியாகுலமும் உண்டாகும். (ரோமர் 2:8-9)
கர்த்தருடைய சரீரம் இன்னதென்று நிதானித்து அறிந்தால், சண்டைச் சச்சரவுகளுக்கு இடமிருக்காதே. (1 கொரி. 11:29)
மூன்று காரியங்களை குறிப்பாக பவுல் குறிப்பிடுகிறார். 1. பலவீனமானவை, 2. கனவீனமானவை, 3. இலட்சணமில்லாதவை. (1 கொரி. 12:22,23)
சரீரத்திலே பிரிவினையுண்டாயிராமல், அவயவங்கள் ஒன்றைக்குறித்து ஒன்று கவலையாயிருக்கும்படிக்கு, தேவன் கனத்தில் குறைவுள்ளதற்கு, அதிக கனத்தைக் கொடுத்து, இப்படிச் சரீரத்தை அமைத்திருக்கிறார் (1 கொரி. 12:25) என்ற வசனம் எத்தனை அர்த்தமுள்ளது. என்ன? தேவனே பலவீனமானவைகளை பலவீனமாகச் சிருஷ்டித்தாரா?
இது பாவத்தில் விழுந்து எழுந்திருக்கும் சுபாவத்தினைக் குறிப்பது அல்ல; மாறாக, விசுவாசத்தில் பலவீனமானவர்களைக் குறிக்கிறது (ரோமர் 14:1). சாப்பாட்டு விஷயத்தில், நாட்களை விசேஷமாக்குவது போன்ற காரியங்களில் என்று பவுலே விளக்கமளிக்கிறார் (ரோமர் 14:2,5). இப்படிப்பட்ட விஷயங்களில் மற்றவர்களை அற்பமாக எண்ணவோ, குற்றவாளியென்று தீர்க்கவோ நமக்கு அதிகாரமில்லையே. (ரோமர் 14:10)
போஜனத்தினாலே நீ மற்றவர்களை விசனப்படுத்தக்கூடும் என்பதனை மறக்கலாகாதே (ரோமர் 14:15). பலவீனனுக்கும் எளியவனுக்கும் அவர் இரங்கி, எளியவர்களின் ஆத்துமாக்களை இரட்சிப்பார் (சங். 72:13). இஸ்ரவேலரில் பலவீனப்பட்டவன் இருந்ததில்லையே (சங். 105:37). இன்றைக்கு சீக்கியரில் ஒருவரும் பிச்சைக்காரர் இல்லை என்பது கவனிக்கத்தக்கது.
யாக்கோபு பலவீனமான ஆடுகள் பொலியும்போது நடந்துகொண்ட விதம் நமக்குத் தெரியுமே (ஆதி. 30:42). பலவீனமானவர்களை சத்துரு எளிதாக பின்னணியில் தாக்குகிறானே (உபா. 25:18). எனவே சபையானது பலவீனரின் மேல் அதிக கவனம் செலுத்தவேண்டுமே.
தான் அபிஷேகம் பண்ணப்பட்டவனாயிருந்தபோதிலும், பலவீனன் என்பதனை தாவீது அறிந்திருந்தானே. (2 சாமு. 3:39)
நீங்கள் பலவீனமானவைகளைப் பலப்படுத்தாமலும், நசல்கொண்டவைகளைக் குணமாக்காமலும், எலும்பு முறிந்தவைகளைக் காயங்கட்டாமலும், துரத்துண்டவைகளைத் திருப்பிக்கொண்டு வராமலும், காணாமற்போனவைகளைத் தேடாமலும் போய், பலாத்காரமும் கடூரமுமாய் அவைகளை ஆண்டீர்கள் (எசே. 34:4) என்பதுதானே தேவன் மேய்ப்பர்களைக் குறித்துச் சொன்ன குற்றச்சாட்டு.
நீங்கள் பலவீனமாயிருக்கிறவைகளையெல்லாம் புறம்பாக்கிச் சிதறப்பண்ணும்படி, அவைகளைப் பக்கத்தினாலும் முன்னந்தொடையினாலும் தள்ளி உங்கள் கொம்புகளைக்கொண்டு முட்டுகிறீர்கள் (எசே. 34:21) என்பதுதானே அவரின் அங்கலாய்ப்பு.
இயேசு தாமே நம்முடைய பெலவீனங்களை ஏற்றுக்கொண்டு, நம்முடைய நோய்களைச் சுமந்தார் (மத். 8:17) என்பது இன்றைக்கு அநேக வேளைகளில் தப்பர்த்தப்படுத்தப்படுகிறதே.
மாம்சம் பலவீனமானது என்று சொன்ன ஆண்டவர், அதனை மேற்கொள்ளவே விழித்திருந்து ஜெபிக்கச் சொன்னரே. (மாற். 14:38)
பதினெட்டு வருஷமாய் பெலவீனப்படுத்தும் ஆவியைக் கொண்ட ஸ்திரியை (ஆபிரகாமின் குமாரத்தி - விசுவாசி) இயேசு குணமாக்கினதனைப் பொறுக்கக்கூடாத ஒரு கூட்டம், சபையிலே எப்போதுமே உண்டு (லூக். 13:11,14). பலவீனரைத் தாங்குவது இயேசுவின் போதனை அல்லவா! (அப். 20:35)
விசுவாசத்தில் பெலன் கொண்டால்தானே ஆபிரகாமைப் போல நூறு வயதிலேயும் பிள்ளைகளைப் பெறமுடியும் (ஆத்துமாக்களை ஆதாயம் செய்வதனைக் குறித்துச் சொல்லுகிறேன்). (ரோமர் 4:19)
நமது பலவீனங்களின் நிமித்தம் நாம் அநேக நேரங்களில் தேவ சித்தத்தினை அறியக்கூடாமல் தவிக்கிறோமே. அதனை பூர்த்தி செய்யத்தானே ஆவியானவர் நம்முடைய பலவீன ஆவியோடு இணைந்து வாக்குக்கடங்காத பெருமூச்சுகளோடு நமக்காக வேண்டுதல் செய்கிறார். (ரோமர் 8:26)
அன்றியும், பலமுள்ளவர்களாகிய நாம் நமக்கே பிரியமாய் நடவாமல், பலவீனருடைய பலவீனங்களைத் தாங்கவேண்டும் (ரோமர் 15:1) இது தேவ கட்டளையல்லவா!
ஞானிகளை வெட்கப்படுத்தும்படி தேவன் உலகத்தில் பைத்தியமானவைகளைத் தெரிந்துகொண்டார்; பலமுள்ளவைகளை வெட்கப்படுத்தும்படி தேவன் உலகத்தில் பலவீனமானவைகளைத் தெரிந்துகொண்டார். (1 கொரி. 1:27)
பலவீனமான சகோதரன் உன் அறிவின் நிமித்தம் கெட்டுப்போய்விடக்கூடாது (1 கொரி. 8:11) ஜாக்கிரதை! பலவீனமுள்ள மனசாட்சியை உடையோரைப் புண்படுத்துவது, கிறிஸ்துவுக்கு விரோதமான பாவம் அல்லவா! (1 கொரி. 8:12)
'பலவீனரை ஆதாயப்படுத்திக்கொள்ளும்படிக்குப் பலவீனருக்குப் பலவீனனைப்போலானேன்' என்றும் சொல்லும் பவுல்கள் எழும்பவேண்டுமே (1 கொரி. 9:22). மற்றவர்கள் பலவீனப்படும்போது அது என்னையும் பலவீனனாக்குகிறது என்பது நாம் அறியவேண்டிய பேருண்மை. (2 கொரி. 11:29)
என் பலவீனங்களில் நான் மேன்மைபாராட்டுகிறேன் (2 கொரி. 11:30) என்ற பவுலை, அது அதிக கிருபையைப் பெற்றுக்கொள்ளவே என்பது நம்மை நடுங்கச்செய்யுமே. அதனால், கிறிஸ்துவின் வல்லமை என்மேல் தங்கி கிரியை செய்கிறது என்பதுதானே வெளிப்பாடு. (2 கொரி. 12:9,10)
நம்முடைய பலவீனங்களைக்குறித்துப் பரிதபிக்கக்கூடாத பிரதான ஆசாரியர் நமக்கிராமல், எல்லாவிதத்திலும் நம்மைப்போல் சோதிக்கப்பட்டும், பாவமில்லாதவராயிருக்கிற பிரதான ஆசாரியரே நமக்கிருக்கிறார். ஆதலால், நாம் இரக்கத்தைப் பெறவும், ஏற்ற சமயத்தில் சகாயஞ்செய்யுங் கிருபையை அடையவும், தைரியமாய்க் கிருபாசனத்தண்டையிலே சேரக்கடவோம் (எபி. 4:15,16); சேரப்பண்ணுவோம்.
விசுவாசத்திலேயே பலவீனத்தில் பலன்கொண்ட முன்னோடிகளின் சாட்சிகள் நம்மை முன்னேறச் செய்வதாக! (எபி. 11:34)
மிதியிட்ட ஒரே களிமண்ணினாலே குயவன் ஒரு பாத்திரத்தைக் கனமான காரியத்துக்கும், ஒரு பாத்திரத்தைக் கனவீனமான காரியத்துக்கும் பண்ணுகிறதற்கு மண்ணின்மேல் அவனுக்கு அதிகாரம் இருப்பதுபோல, தேவனே கனத்தில் குறைந்தவர்களாக சிலரை வைத்துள்ளார் என்கிற அறிவு சபையில் பெருகினால் அலட்சியப்படுத்துதல் உள்ளே வராது. (ரோமர் 9:21)
கனத்தைத் தேடும் ஊழியர்கள் எத்தனை பேர்! என்னைக் கனம்பண்ணவில்லை என்று கோபித்துக்கொண்டோர் ஐக்கியத்திற்குப் பெரிய எதிரி என்றே சொல்லுவேன்.
என்னைக் கனம்பண்ணுகிறவர்களை நான் கனம் பண்ணுவேன் என்பது தேவ நியதியாய் இருக்கிறபடியால் (1 சாமு. 2:30), என்னை அசட்டைபண்ணுகிறவர்கள் கனஈனப்படுவார்கள் என்பதனை அறிந்தால், தேவனுக்கு கனத்தைச் சேர்க்கவே நாம் பிரயாசப்படுவோமே! அது நம்மையும் கனப்படுத்திவிடும் அல்லவா! இயேசுவை சுமக்கும் கழுதைக்குத்தான் எத்தனை வரவேற்பு. (மாற். 11:7,8)
ஒருவன் எனக்கு ஊழியஞ்செய்தால் அவனைப் பிதாவானவர் கனப்படுத்துவாரே (யோவான் 12:26); இதனைச் செய்தால் நான் வருத்தப்படுவதற்குத் தேவையல்லவே! 'பந்தா ஊழியர்' இதனை அறிந்தால் எத்தனை நலமாயிருக்கும். சபையின் கமிட்டி மெம்பர்களும் இதனை உணர்வார்களோ!
இலட்சணமற்ற நலிந்த, மெலிந்த சபைகளின்மேல் கவனம் அதிகம் தேவை. ஆனால், நாமோ, கூட்டம் அதிகமிருக்கும் சபையில் மெம்பர் என்பதிலேயே பெருமைகொள்ளுகிறோம். அலங்காரமாய்க் கட்டப்படும் சபைகள், சாதாரணமாகத் தோற்றமுடையதும், பேணிப்பாதுகாக்கத்தானும் பெலனற்ற சபைகளைக் குறித்துக் கவலையோ, கரிசனையோ கொள்வதில்லை; மாறாக, புதிய, புதிய தோரணங்களை மாட்டிவைத்து, பொருத்தனை செய்தேன் என்று பிதற்றிக்கொண்டு, அசனப்பண்டிகையில் அனைவரும் அறிய மேலும் மேலும் அலங்கார விளக்குகளை மாட்டி, தங்களின் பணபலத்தினைக் காட்டிக்கொள்ளுவோர் நிறைந்தது நம்முடைய சபைகள்.
கூடிவரவும் இடம் இல்லாமல் மரத்தடியில் சபை கூடி ஆராதிக்கும் ஆயிரமாயிரம் இடங்கள் மிஷனரிப் பணித்தளங்களில் உண்டு. கோவை பட்டணத்திலுள்ள ஒரு சபை, பீஹாரில் சபைக் கட்டிடம் கட்ட ரூ. 5 லட்சம் கொடுத்துவிட்டோம் என்று பெருமைபாராட்டுவோரை நான் கண்டிருக்கிறேன். தங்கள் வீடுகளில் கழிப்பறைக்குப் பல இலட்சங்களைக் கொட்டித் தீர்க்கும் இவர்கள், ஏதோ சாதித்துவிட்டது போன்று தம்பட்டம் அடிக்கும் வேடிக்கைகள் உண்டு. தேவன் அவர்களை மன்னிப்பாராக, கண்களைத் திறந்துவிடுவாராக.
தேவ வசனம் போதிக்கவேண்டிய விதமாய்ப் போதிக்கப்பட்டிருந்தால், இந்த அவல நிலை நேரிட்டிருக்காதே!
ஸ்திரியானவள் தேவனை நோக்கி ஜெபம்பண்ணுகையில் தன் தலையை மூடிக்கொள்ளாதிருக்கிறது இலட்சணமாயிருக்குமோ என்பது பவுலின் ஆச்சரியக் கேள்வி (1 கொரி. 11:13). ஆனால், இன்றோ அதற்கு ஒரு விதண்டாவாதம். நவீனம் போற்றப்படும்போது எளிமை அகன்றுபோகுமே.
தன்னுடைய மயிரலங்காரத்தினை மற்றவர்கள் காணவேண்டும், தலையில் வைத்திருக்கும் பூக்களின் அளவை மற்றவர்கள் பார்க்கவேண்டும் பாராட்டவேண்டும் என்று எண்ணும் எந்த பெண்ணும் இதற்குக் கீழ்ப்படிய தயங்குகிறாள். பெருமைக்கு தேவன் எதிரி என்பது அநேகருக்கு தெரிவதில்லை. (யாக். 4:16)
தேவகண்ணோட்டத்தில் சபை தன்னைப் பார்க்குமானால், சண்டைகளுக்கும் அடிபிடிகளுக்கும் இடமில்லாமல் போய்விடுமே!
வீம்பு செய்கிறவர்கள், தேவ வார்த்தையையோ, முன்னோர்களின் தேவ பயத்தினையோ, தியாகத்தினையோ அறிந்தாரில்லை. பழிக்குப் பழி என்ற மிருக குணமே இன்று சபைகளைப் பிடித்து ஆட்டும் பொல்லாத சக்தி.
தேசத்தில் சர்வாதிகார சக்திகளின் ஆதிக்கம் வெளிப்பட்டு, சீரழிவு உண்டாயிருக்கிறது. ஜனநாயக நாட்டில் அதிகாரமும் ஆணவமும் தலைவிரித்தாடுகிறது. எனவே, அதனை எதிர்ப்போம் என்று அரசியல் கட்சிகள் தங்களுக்குள் இருக்கும் வேற்றுமைகளை மறந்து இணைந்து செயல்பட முன்வரும்போது...
ஒரே தேவனை உடையவர்களும், இயேசு கிறிஸ்துவின் இரத்தத்தினால் கிரயத்திற்குக் கொள்ளப்பட்டோமென்று (1 கொரி. 6:20) தம்பட்டம் அடித்துக்கொள்வோரும், சகோதரனோடே சகோதரன் வழக்காடுகிறான், அவிசுவாசிகளுக்கு முன்பாகவும் அப்படிச் செய்கிறான் (1 கொரி. 6:5) என்ற வசனத்தின்படி கேவலப்பட்டு, கூனிக் குறுகியிருக்கும் வண்ணமாய் கூக்குரல் இட்டு, சபை வளாகத்திலேயே அவமானப்படும் காட்சியினை பரலோகம் எத்தனை நாட்களுக்குச் சகிக்குமோ!
'நீ விழித்துக்கொண்டு, சாகிறதற்கேதுவாயிருக்கிறவைகளை ஸ்திரப்படுத்து; உன் கிரியைகள் தேவனுக்குமுன் நிறைவுள்ளவைகளாக நான் காணவில்லை. ஆகையால் நீ கேட்டுப் பெற்றுக்கொண்ட வகையை நினைவுகூர்ந்து, அதைக் கைக்கொண்டு மனந்திரும்பு. நீ விழித்திராவிட்டால், திருடனைப்போல் உன்மேல் வருவேன்; நான் உன்மேல் வரும்வேளையை அறியாதிருப்பாய் (வெளி. 3:2,3) என்கிற தேவ சத்தம் சபை மக்கள் மீது எக்காளத் தொனியாய் தொனிப்பதாக. ஜெபிப்போம், சுவிசேஷ ஊழியத்திற்குத் தடையான இவைகளைத் தேவன் அழிப்பாராக.
பலவீனரைத் தாங்க மனதிரங்குவோம்
பலத்தினைக் காண்பிக்க அல்ல உபயோகிக்க விரும்புவோம்
கனத்தினை நாடி ஓடி உழைத்தது போதும்
கர்த்தரின் கனத்தினை நாடி அதனையே மேன்மைப்படுத்துவோம்
இலட்சணமில்லாத, நலிந்தவற்றினை நினைப்போம்
இலட்சங்களை அவைகளுக்காக செலவழிக்க வகை தேடுவோம்
வீண் பெருமையும் வீம்பும் அகற்றுவோம்
விண்ணிலிருந்து எச்சரிக்கைச் சத்தம் கேட்கிறதே செவிகொடுப்போம்
பலமறிந்தெம்மைப் புதுவழிகளில் நடத்திடுவாரே
பலமாய் அவர் நாமம் தேசத்தில் தொனிக்க பெலன் பெறுவோம்
பலவீனர் என்று தள்ளிடாமல் அவரின் பெலம் பெருக உழைப்போம்
பரலோகம் மகிழும் பரிசும் கிடைக்கும் பாரதம் இயேசுவைக் காணுமே
அன்பரின் அறுவடைப் பணியில்
சகோ. D. அகஸ்டின் ஜெபக்குமார்