January 2023
கிறிஸ்துவுக்குள் அன்பான ஜெபப் பங்காளரே,
பூத்துக்குலுங்கும் திராட்சக் கொடிகள் நிறைந்ததும், காய்த்து கனிகளால் நிறைந்ததுமான அத்திமரங்களால் சூழப்பட்டதும், கந்தப்பிசினினால் வாசனை ஊட்டும் மரங்களினால் நிறைந்ததுமான தன்னுடைய தோட்டத்தில் உலாவிவரும் நேசரின் நாமத்தில் புத்தாண்டு வாழ்த்துகள் (உன். 2:13; 4:16; 5:1). புத்தாண்டு பொங்கிவரும் எண்ணங்களால் ஒருபுறம் நிறைந்திருக்க, அனைத்தையும் செய்துமுடிக்கவேண்டுமே என்ற ஏக்கத் தொனியுடனே கூட, புது எண்ணெயால் அபிஷேகிக்கப்பட்டு, புதுப்பாடலால் நிறைந்த ஆண்டாக இருக்க வாழ்த்துகிறேன். (சங். 92:10; சங். 40:3)
இந்த உற்சாகத்தின் மத்தியில், நமக்கு முன் கொடுக்கப்பட்ட காலம் ஓராண்டு குறைந்துபோனதும் உண்மை. தனக்கு இன்னமும் கொஞ்ச காலம் மாத்திரமே உண்டென்று அறிந்த சத்துருவாம் சாத்தான் (வெளி. 12:12), மிகுந்த கோபம் கொண்டவனாய் வேகமாக தன்னுடைய அக்கினி ஆஸ்திரங்களை உபயோகிக்க ஆரம்பித்துவிட்டதனை நித்தமும் சந்திக்கவேண்டிய சபையாம் மணவாட்டி இன்னமும் நித்திரை மயக்கத்தில் இருப்பதும் (உன். 5:2), செயல்படவேண்டியதில் காலம் கடத்துவதும், சாக்குப்போக்குகளைச் சொல்லிக்கொண்டு (உன். 5:3) இன்னும் கொஞ்சம் உறங்கட்டும், இன்னும் கொஞ்சம் தூங்கட்டும், இன்னும் கொஞ்சம் கைமுடக்கிக்கொண்டு நித்திரை செய்யட்டும் என்பது ஏனோ? (நீதி. 6:10). அது சபையினை தரித்திரத்திற்கும், வறுமையின் தாக்குதலுக்கும் அல்லவோ வழிநடத்தும் (நீதி. 24:33,34). அதனையும் அறியாமல் லவோதிக்கேயா சபையைப் போன்று, ஜம்பம் அடித்துக்கொண்டு நிற்கிற நிலை, இந்த ஆண்டிலாவது முடிவுக்கு வராதோ? (வெளி. 3:17). 'இனி காலம் செல்லாது' (வெளி. 10:6) என்று வானத்திலிருந்து பலமாய் கேட்டும் (வெளி. 10:4), ஆழ்ந்த உறக்கத்தில் சில ஊழியரும்கூட எதையோ பிதற்றிக்கொண்டு திரிகின்றாரே!
சொப்பனங்கண்டவனைப் போல, 'பசியாயிருக்கிறவன் தான் புசிக்கிறதாகச் சொப்பனம் கண்டும், விழிக்கும்போது அவன் வெறுமையாயிருக்கிறதுபோலவும், தாகமாயிருக்கிறவன், தான் குடிக்கிறதாகச் சொப்பனம் கண்டும், விழிக்கும்போது அவன் விடாய்த்துத் தவனத்தோடிருக்கிறதுபோலவும்' (ஏசா. 29:8), வெறுமனே வாய்ச் சாலகத்தில் மாளிகையைக் கட்டுகிறவனைப் போல, பிரசங்க பீடத்தில் வாந்தி செய்துகொண்டிருக்கும் காட்சி, நம்மை கண்ணீர் விடச் செய்கிறது. (ஏசா. 28:8 எரே. 48:26)
வேறு சிலரோ, நமக்கு இருக்கும் கொஞ்ச பெலனை வைத்து, நாம் என்ன சாதித்துவிட முடியும் என்று ஒதுங்கி நிற்பதும் (நியா. 6:11-16), செயலாற்ற துணிவில்லாமல் தங்களின் நிலையையும், தேவனின் பராக்கிரமத்தினையும் புரியாமல் தத்தளிக்கும் காட்சியும் கூடவே காணக் கிடைக்கிறது.
நித்திரை மயக்கம் (மத். 26:43), தங்களைச் சுற்றி நடப்பவைகளை உணரக்கூடாது ஆக்கிவிட்டது (அப். 12:9). திறக்கப்படக்கூடியக் கதவோ, விழுந்துவிட்ட சங்கிலியோ, வழிநடத்தும் தேவ குரலோ அவர்களுக்குத் தெரியவேயில்லை ஏன்? விளங்கவும் இல்லை என்னே பரிதாபம். அநேக ஊழியங்களின் நடவடிக்கைகளைக் கவனித்தால், இது நன்கு வெளிப்படையாகத் தெரியும். பிரபலமாகுவதிலேயே அநேகருக்குக் கவனம் உள்ளதினால், பணத்தைப் பெருக்குவதிலேயோ அல்லது கோமாளித்தனம் செய்து கூட்டத்தினைக் கவருகிறதிலேயோ அல்லது ஏதோ ஒன்றை புதுமையாகப் புகுத்த நினைப்பதினாலேயோ (அதனுடைய விளைவு என்ன? என்பதனை கூட்டிக் கழித்துப் பார்க்கக் கூடாதபடி, அந்த அற்ப ஆசை அவர்களுடைய கண்களைக் குருடாக்கினதினால்), வெளிப்பாடுகள் நிறைந்த ஊழியம் என்று தம்பட்டம் அடித்துக்கொள்வதாலோ, உணர்வற்ற ஊழியங்கள் ஏராளமாக எழும்பிவருகின்றன.
சில நேரங்களில் ஒரு காரியத்திற்காகச் செலவு செய்யப்படும் பணம், மனித வளம், நேரம் போன்றவை ஏராளமாக வீண் ஜம்பத்திற்காக வெளிப்பாடுகள் என்ற பெயரில் விரயமாகிறது அல்லவா? உதாரணமாக, 10,000 பேரை உலகின் மூலைகளிலும், இந்தியாவின் மூலைகளிலும் இருந்து கூட்டி ஜெபிக்கவைப்பது, எத்தனை பண விரயத்தினைக் கொண்டுவரும் என்பதனை அறிந்தவர் எத்தனை பேர்?
10,000 பேர் செலுத்தும் தொகை, ஆளுக்கு ரூ. 5000 என்றால்
ரூ. 5,00,00,000 (5 கோடி). இவர்களின் சராசரி பிரயாணச் செலவும் இதரச் செலவும் கிட்டத்தட்ட ரூ. 10,000 என்றால் (ஏனென்றால், அநேகர் விமானத்தில் வருகிறார்கள் சிலர் வெளிநாட்டிலிருந்து வருகிறார்கள்) ரூ. 10 கோடி. மற்ற கூடாரச் செலவுகளும், ஒளி மற்றும் ஒலிப்பெருக்கி, நடத்துவோரின் பிரயாணச் செலவுகளுமாக 5 கோடி வரை எதிர்பார்க்கலாம் மொத்தம், ரூ. 20 கோடி. இத்தனை பணத்தினை வைத்து ஜெபித்தால் தேசத்தில் எழுப்புதல் வந்துவிடும் என்பது என்னைப் பொறுத்தமட்டில் அபத்தமே.
உடனே, அன்றைய பரிமளத் தைலத்தினை இயேசுவின் பாதத்தில் ஊற்றின மரியாளின் காரியத்தைச் சொல்லி, யூதாஸின் கருத்தையும் எடுத்துக்கூறி, எனக்கு யூதாஸ் என்று 'பட்டம்' சூட்டிவிடுவார்கள்
(மாற். 14:1-9 யோவா. 12:4). சகோ. அகஸ்டின் ஜெபக்குமார் எப்பொழுதுமே இப்படித்தான், மற்றவர்களின் காரியத்தினைக் குறை கூறுபவர் என்று சொல்லுவார்கள்.
ஆனால், தேவ சமூகத்தில் திறந்த மனதோடுகூட இந்தத் திட்டத்தினை கொஞ்சம் ஆராய்ந்தால் (இது சுய லாபத்திற்காக இல்லாவிட்டாலும், சுய விளம்பரத்திற்குப் போதுமானது என்றே கூறுவேன்), பணம் வைத்திருப்பவர்கள் கூடி ஜெபித்தால்தான் எழுப்புதல் வரும் என்பது எளியவர்களின் ஜெபத்தினைக் கிண்டல் செய்வது போல இல்லையா?
இஸ்ரவேலில் போய் 100 பேர் ஜெபித்தால்தான் தேசம் மாற்றப்படும் என்று, 100 பேரை தலா ரூ 1.5 (ஒன்றரை) லட்சம் கொடுத்து இஸ்ரவேலுக்கு அழைத்துச் சென்று ஜெபிக்கும்போது, 1.5 கோடி செலவில் ஜெபம் என்றால், தானியேல் பாபிலோனிலிருந்து எருசலேமுக்காக ஜெபித்ததும், நெகேமியா சூசான் அரண்மனையில் இருந்து ஜெபித்ததும் வீணானவை போலவே காட்சி அளிக்கும் அல்லவா! (தானி. 6:10,11 நெகே. 1:1,4). யாருக்கோ இதனை தேவன் வெளிப்படுத்தினார் எனவே, அந்த ஜெபத்தினால்தான் காரியங்கள் வாய்க்கும் என்ற காரியம், தேவ முறைகளைக் கேலி செய்வதாகவே தோன்றுகிறது!
உல்லாசத்திற்காக அவர்கள் செலவழிக்காமல் இருக்கலாம் ஆனால், விளம்பரத்திற்காக என்பதனை மறுக்க முடியாது. தங்கள் காரியங்களை அவர்கள் நியாயப்படுத்த, அநேக வாதங்களை வைக்கலாம் ஆனால், தேவ வார்த்தையின் வெளிச்சத்தில் அவை மாயையானத் திட்டங்களே.
நான் கூடி ஜெபிப்பதற்கு விரோதி அல்ல (யோவேல் 2:16,17 2 நாளா. 20:3,4). 2 நாளா. 30:1-ல் எசேக்கியா ராஜா ஜனத்தினைக் கூட்டி ஜெபிக்கச் செய்தபோது, எழுப்புதல் எருசலேமிலே உண்டாயிற்று (2 நாளா. 30:26). ஆனால், எசேக்கியாவின் மகன் காலத்திற்குக் கூட அதின் தாக்கம் உண்டாகவில்லையே (2 நாளா. 33:2,3) மாறாக, தன் மகனையே தீ மிதிக்க வழி செய்தானே. (2 இராஜா. 21:6)
ஆனால், எஸ்றாவைப் பாருங்கள் எஸ்றா 9-ம் அதிகாரம் அந்த காட்சியை நமக்குத் தருகிறதே. எஸ்றாவின் மனநிலையில் உண்டான அங்கலாய்ப்பு, 'என் வஸ்திரத்தையும், சால்வையையும் கிழித்து, என் தலையிலும், என் தாடியிலுமுள்ள மயிரைப் பிடுங்கித் திகைத்தவனாய் உட்கார்ந்தேன்', அப்பொழுது சிறையிருப்பிலிருந்து வந்தவர்களுடைய குற்றத்தினிமித்தம் (ஜனங்கள் பாபிலோனை விட்டது என்னவோ உண்மை ஆனால், பாபிலோனின் ஆவியிலிருந்து விடுதலை பெறவில்லை), இஸ்ரவேலுடைய தேவனின் வார்த்தைகளுக்கு நடுங்குகிற யாவரும் என்னோடே தானாக (அழைப்பில்லாமலேயே) கூடிக்கொண்டார்கள். (வச. 3,4)
தலைமையில் இருக்கிறவர்கள் சிந்திக்கவேண்டிய நேரமிது! அன்றைக்கு எருசலேமில் ஜனத்தினைக் கூட்டுவது எளிது கூடவே, அதிகபட்சத் தூரம் வெறும் 350 கி.மீ. இவர்களோ, 3000 கி.மீ தூரத்தில் இருப்பவர்களை இந்தியாவிலும், தென் ஆப்பிரிக்காவில் இருக்கிறவர்களை 15000 கி.மீ தொலைவிற்கும் அழைக்கிறார்கள் என்னே அபத்தம். தங்களை அறிவாளிகளாகவும், ஆவிக்குரியவர்களாகவும் சித்தரிக்க விரும்புகிறார்களா? அல்லது எதனையோ தங்கள் வட்டாரத்தில் உள்ளவர்களுக்குக் காட்டிக்கொள்ள விரும்புகிறார்களா? தேவ வெளிச்சத்தில் பதில் கேட்டால் கிடைக்குமே!
சத்துரு தந்திரமாக தேவ ஜனத்தின் பணம், நேரம், தாலந்துகள், திறமைகள், கவனம், கரிசனை அனைத்தையும் திசைதிருப்ப, அழகாகத் திட்டங்களைத் தீட்டி, அவர்களைக் கொண்டே நிறைவேற்றிவருகிறான்.
பிரபல சுவிசேஷகர் ஒருவரின் மகள் அணியும் ஆடை வுஏ-ல் ஒளிபரப்பப்படும்போது, அதனைக் காணும் இளம் பிள்ளைகள், 'அவளையே தேவன் உபயோகப்படுத்துகிறாரே. நானும் ஏன் இப்படி உடுத்தக்கூடாது?' என்று கேள்வி கேட்டு, பெற்றோரின் வாயை மூடும் பிள்ளைகள் எத்தனை பேர்? முன்மாதிரியாக உடுத்தவேண்டிய அவர்களின் உடை, இப்படியாகத் தடையாக மாறுவதற்கு அவர்களுக்குப் போதனை செய்வது எந்த ஆவி (1 இராஜா. 22:19-24). இடறல் உண்டாக்குவது வலதுகையாக (மிகவும் எல்லா வேலைக்கும் உபயோகப்படுவது) இருந்தாலும், வெட்டி எறிந்துவிடு என்றவர்தானே அன்பின் ரூபியாம் இயேசு (மத். 5:30). இவரைப் போதிக்கும் இவர்கள் இந்த வசனத்தினை ஏன் அப்பியாசிப்பதில்லை?
கர்த்தர் எனக்குச் சொன்னார் என்றதனால், மற்ற உண்மைகளுக்கு இடம் இல்லை என்று அர்த்தம் இல்லையே. விரயமாக்கப்படுவதும், இடறப்பண்ணுவதும் 'நட்சத்திர ஊழியர்களாலேயே!' சாலொமோனின் தேவ ஆலயத்தினைப் போன்ற ஓர் அலங்கார ஆலயத்தைக் கட்ட வெளிப்பாடு பெற்றேன் என்கிறார் ஒரு தேவ மனிதர். அந்த வெளிப்பாட்டினை, தேவ இராஜ்யத்தினை உண்மையாய்க் கட்ட விரும்புகிறவர்களோடு பகிர்ந்துகொண்டு ஜெபித்திருந்தால், சரியான பாதையில் நடந்திருக்கலாமே. இந்த ஆண்டில் அரசின் சட்டங்கள் இன்னமும் கடுமையாகலாம், சுவிசேஷச் செய்தியினை அறியாதவர்களுக்குப் பரப்ப முடியாதபடி தடைகள் பெருகலாம்.
இருக்கும் கொஞ்ச காலத்தினைக் கருத்தில் கொண்டு, தேவன் கட்டளையிடாத அக்கினிகளை அடையாளம் கண்டுகொண்டு (லேவி. 10:1,2), விரயங்களையும், வீணடிக்கும் ஊழிய முறைகளையும், வேதம் காட்டிக்கொடுக்காத காரியங்களையும், இயேசுவோ அல்லது அப்போஸ்தலர்களோ செய்திராத முறைகளையும் விட்டுவிட்டு திரும்புவோம்.
நாளொன்றுக்குப் புதிதாக பூமியில் சேரும் ஜனத் தொகையின் பெரும் பகுதி, நம் நாட்டிலேதான் உண்டு. 2030-ல் நாம் சீனா உட்பட அனைத்து நாடுகளையும் மிஞ்சிவிடுவோம். இன்று 142 கோடியை உள்ளடக்கிய நம் நாடு, 152 கோடியைத்; தொட்டு, அனைத்து நாடுகளையும் முந்திக்கொள்ளும். வரும் 8 ஆண்டில் 10 கோடி பேர் புதிதாகச் சேர்க்கப்படப்போகிறார்கள் 12 கோடி பேர் பிறக்கப்போகிறார்கள் 2 கோடி பேர் இறக்கப்போகிறார்கள். இறக்கப்போகிறவர்களும், பிறக்கப்போகிறவர்களுமாகச் சேர்த்து, ஒரு வருடத்தில் 2 கோடி புதியவர்களுக்கும் நற்செய்திப் பணி கடந்துசெல்ல வேண்டும். தற்போது உலகின் ஜனத் தொகை 800 கோடி அல்லவா.
ஒருபக்கம் நெருக்கத்தின் மிகுதி, கதவுகள் அடைக்கப்பட்டதால் காட்டப்படும் துரிதம். மறுபக்கம் மக்கள் தொகைப் பெருக்கம். இதற்கிடையில் தேவ சபையில் கன்றுக்குட்டி நடனங்கள், அசட்டை, வீண் செலவுகள், திசைதிருப்ப ஆவிக்குரிய போர்வையில் சத்துரு செய்யும் உபாயத் தந்திரங்கள் (அதுவும் தேவ ஊழியர்களைக் கொண்டே) அனைத்தும் அறிந்து, எச்சரிக்கை செய்ய தேவ சபை எழும்பி நிற்காதோ!
புநுஆளு ஊழியத்தில் தீவிரம் காட்ட, 7 வகை ஊழியங்களிலும், தேவ உதவியுடனும், பங்காளர்களுடனும், ஜெபிக்கிற தேவ பிள்ளைகளின் ஒத்தாசையினாலும், பலவிதமான காரியங்களை முன்னெடுக்க தேவன் தயை செய்திருக்கிறார்.
எல்லாவித பணிகளையும் (சுவிசேஷப் பணி, சபை நிறுவும் பணி, பயிற்சிப் பணி, கல்விப் பணி, மருத்துவப் பணி, மனிதாபிமானப் பணி, ஊடகப் பணி மற்றும் நிர்வாகத்திலும்) விசாலமாக்கவும், தன்னிறைவு கொண்டதாகச் செயல்படுத்தவும், இருக்கின்ற அடுத்த பத்தாண்டு திட்டத்தில் (கிறிஸ்துவின் வருகை தாமதிக்கும் எனில்) சமுதாயங்களை தேவ இராஜ்யத்திற்கு ஆதாயப்படுத்தவும் உங்கள் ஜெபத்தை நாடுகிறோம்.
எல்லாவற்றிற்கும் மேலாக, அதற்காக ஊழியர்களையும் தேவன் எழுப்பித்தரவேண்டும். வரும் ஆண்டில் 'GATHER STRENGTH AND I.M.P.A.C.T’ (I MUST PREPARE A COMMUNITY TODAY) என்ற குறியீட்டின் கீழே செயல்பட எடுக்கும் எல்லா முயற்சிகளும், தேவ சமூகத்தில் காத்திருந்து பெற்றதின் விளைவு.
எப்பொழுதுமே பணிக்கு 'வேலையாட்கள் தேவை'. தேவ கரம் நம்மை வழிநடத்தவும், தேவ சத்தம் கேட்டு கீழ்ப்படியும் இதயம் தலைவர்கள் அனைவருக்குள்ளும் இருக்கவும் உங்கள் ஜெபம் தேவை. இயேசுவும் இதற்காகத்தானே ஜெபித்தார் (யோவான் 17:21). நம்முடைய ஜெபமும் இதனைச் சார்ந்தே இருப்பதாக.
திறவுண்ட வாசல் அடைக்கப்பட ஆயத்தங்கள் நடக்கிறதே
திறமைகளை விரயமாக்கும் திருச்சபையே நீ திரும்பிப் பார்க்காதே
தினம் தினம் செத்து மடிவோர் உன்னை அசைக்கவில்லையோ!
தூய ஆவியின் பெலனில் நீ நிற்க உன் இதயத்தை நிரப்பாதோ
தேவ பிள்ளைகளையே கொண்டு திறமையாய் சத்துரு திட்டங்களை நிறைவேற்றுகிறான்
தேவன் காணாதிருக்கிறார் என்று எண்ணி திடப்படுத்திக்கொள்ளாதே
தூக்க மயக்கம் உன்னை உணர்வற்றவனாக மாற்றி உளறவைத்துவிட்டதோ
தூயவரின் பணியில் தயக்கம் காட்டி தாமதம் செய்துவிடாதே
துரிதம் காட்டவேண்டிய வேளையில் தூக்கம் உன்னைத் தடுக்காதபடி பார்த்திடு
துரத்துண்டோர் உண்டு காணாமற்போனோரும் ஏராளம் உண்டென்பதை மறக்காதே
தூரம் போய்விட்டோரும் உண்டு நசல் கொண்டோருக்குக் குறைவில்லையே
தூயவரின் அன்பை நீ பகிராவிடில் யார் உண்டு அவரின் பணி செய்ய!
அன்பரின் அறுவடைப் பணியில்
அன்பு சகோ. D. அகஸ்டின் ஜெபக்குமார்